Carrick azze mu bigere bya Chris Wilder.
Eyali omuwuwuttanya wa Manchester United,Michael Carrick atandise emirimu gye egy’omutendesi wa Middlesbrough oluvannyuuma lw’okumuwa omulimu guno ng’adda mu bigere bya Chris Wilder,etafuumuulwa nga October 3 ng’akubiddwa emipiira 5 ku egyasoose mu sizoni eno.
Carrick w’atandikidde emirimu nga Middlesbrough eri waggulu akabonero kamu kokka ku abo abali mu bifo ebya ttiimu ezoolekedde okusalwako mu liigi ya Bungereza eya wansi eya Sky Bet Championship.
Ssentebe wa boodi etwala ‘Boro’ nga bw’etera okuyitibwa,Steve Gibson bwe yabadde alangirira okuleetebwa kwa Carrick yamwogeddeko ng’omuntu omutuufu alondeddwa mu kifo kino mu kiseera ekituufu ng’omupiira gwe ogusooka ng’ali mu mitambo gya kiraabu eno bajja kuba bakyalidde Preston ku lwomukaaga mu liigi ya championship.
Carrick 41, guno gwe mulimu ogw’enkalakkalira gw’asoose okufuna okuva lwe yawummula omupiira mu 2018 kubanga abadde ku ttiimu y’abatendesi ba ManU okuviira ddala ku mulembe gwa Jose Mourinho n’ogwa Ole Gunnar Solskjaer bwe yali tannaweebwa gwa kuba mutendesi wa ManU ow’ekiseera ssizoni ewedde nga yagitendeka emipiira esatu gyoka,n’awangulako ebiri ga mulundi gumu.
