Blacks Power ekakasizza Mbalangu.
Oluvannyuma lw’okufuumuulwa babbingwa ba Somalia aba Mogadishu City FC,Hussien Mbalangu ebitaala bimutadde Blacks Power (abagole ba liigi) okuva e Lira bwe bamukakasizza okubawonya okusalwako mu liigi ya babinywera.
Mbalangu ,abadde yaakamala emyezi ena e Somalia,akomyewo mu liigi ya babainywera eya StarTimes Uganda Premier League gye yali yakoma okutendekamu mu January w’omwaka guno bwe yasuulawo ttawulo ku ttiimu ya Mbarara City.
Ono waakusikira Peter Onen eyafuumuddwa oluvannyuma lw’okuzannya emipiira ebiri egya liigi nga tafuna buwanguzi.
Mbalangu bamuwadde eddimu okulinnyisa omutindo gwa Blacks Power oluvannyuma lw’okuzannya emipiira esatu nga terina buwanguzi bwona.
Mbalangu afuuse omutendesi owookusatu ng’atendeka ttiimu eno bukya beegatta mu liigi nga yeegasse ku Anthony Ssekitto ne Peter Onen.
Omupiira gwe ogusooka waakuttunka ne Wakiso Giants ku lwokutaano ku Kabaka Kyabaggu Stadium.
