Abazannyi ba Crested Cranes bakebereddwa ebiragalalagala.
Lillian Mutuuzo
Mu kawefube w’okwetegekera empaka za Afrika, abazannyi ba ttiimu y’eggwanga ey’omupiira gw’abakazi (Crested Cranes) babukezezza nkokola mu ddwaaliro okwekebejjebwa nga tebannayolekera Morocco empaka gye zigenda okubeera nga July 2-23.
Ekibinja ky’abazannyi 15 be baakebereddwa ebiragalalagala nga eteeka lya CAF bwerigamba. Bano bakebereddwa mu bibinja bibiri ng’ekisooka kyakebereddwa ku lwokusaatu.
Nga bavudde mu ddwaaliro, baatukidde mu kutendekebwa era bangi obwedda bawejja wejja olw’obukodyo n’emisinde omutendesi George Lutalo mwe yabyisizza.
Lutalo agamba nti tebalina budde bwakwonoona kuba baagala abazannyi abali fiiti bateekewo okuvuganya okw’enjawulo mu za AWCON.
“Abazannyi naddala bapulo n’abo abazannye CECAFA tulina okubakamulamu obukoowu bwe babadde nabo,” Lutalo bwe yategezezza.
Ku bapulo abatendekeddwa kuliko; Fauzia Najjemba, Sandra Nabweteme ne Yudaya Nakayenza.
